[非Blogger試做] 超詳盡Medilase激光脫毛Pro Test感受

話說我見到Blogger分享試做Medilase，於是我自己就盲中中去左佢地website登記Pro Test。前幾日去左佢地銅鑼灣金朝陽分店，有D失望，不過都有驚喜~

失望嘅原因係，佢地嘅所謂Pro Test，係試打一下laser咁大把= = 我都真係O左咀，唔怪得知個Consultant成日強調Pro Test呢個Term，因為真係Test，唔係同你試做個部位一次。所以Blogger試做同自己登記Pro Test係兩碼子嘅事，大家要留意。(我唔明點解登記時要選擇做邊個部位lor，因為只係打得個一下，同埋你可以叫佢打其他部位試下，不過都係只會打一下架ja)。試打一下嘅感覺係暖暖地，唔覺得痛，不過始終打得一下我唔係試得太真。

另外Medilase係會治療師同Consultant分開的，聽佢地講，治療師唔會sell人。所以負責sell嘅就係個Consultant。今日同我試打一下嗰個治療師，我覺得有D惡，唔記得佢叫咩名。個Consultant就OK ge。BTW, 我o係大堂等緊見Consultant期間，有個治療師同d reception傾計傾到好嘈，呢方面就唔夠專業喇。

驚喜嘅部份係佢價錢比較合理。我自己本身是Dermes做左好多年，Dermes真係好貴(八卦想知我Dermes駛左幾錢可以私留問我)。Medilase有轉會優惠半價(一個部位)，真係平好多。時間方面可以約星期一至六朝早(唔記得幾點)至夜晚9點，變相即係冇分peak/non-peak。

另外要提提大家，佢地對Bikini line嘅定義同一般人理解嘅唔同。我本身以為底褲兩邊突出o黎嘅毛算係Bikini line，但原來唔係，Bikini line只係修你底褲三角形以內嘅毛，兩邊突出o個d要join full Bikini先會脫埋。

不過呢，如果好似我咁自己登記Pro Test，佢會話要即時join先會有轉會優惠。呢點我都真係唔鐘意，成日要人即刻決定，唔俾時間人考慮。不過其實我都有心join，因為半價真係好抵，所以最後都決定join左。

如果你真心想join，可以叫join左嘅朋友refer，咁樣你都會有一個部位半價，而你個朋友就可以儲分換野。奉勸大家唔好自己盲中中上去~如果大家想知多d都可以問我(無論係Medilase, Dermes, Musee, Regen，我都有join)，我會盡可能解答大家嘅問題。重申一次，所有脫毛treatment係我真金白銀俾錢，同任何公司冇任何關係同感情，好同唔好我會照講~我係佢地嘅客人，冇需要特登幫佢地講好說話。